Lexuar 2394
Në fillim të vitit 2012 do të ketë një rritje të re të çmimit të ujit të pijshëm në vend. Kreu i Entit Rregullator të Ujit, Avni Dervishi, tha për RTV SCAN se, kërkesat e operatorëve për rritje të çmimit janë në proces shqyrtimi dhe në muajin Janar do të aplikohet rritja.

Dervishi nuk sqaron se sa do të jetë rritja e çmimit, por shton se, nga 56 operatorë në të gjithë vendin, 16 prej tyre kanë depozituar aplikimet pranë ERU-së për ndryshim të tarifave. Ndërkohë, vlera e tyre do të përcaktohet në bazë të kostos dhe performancës së shoqërive.

Dervishi theksoi se, ndryshimi i tarifave përmirëson eficiencën e kompanive të ujësellës-kanalizimeve, por edhe cilësinë e furnizimit me ujë për qytetarët. Ai përmend edhe elementët e tjerë të cilët ndikojnë në përmirësimin e eficiencës. Pak ditë më parë Banka Botërore, në një raport ka kërkuar rritjen e tarifave të furnizimit me ujë të pijshëm.
ScanTv