Lexuar 5485
Në një artikull të z. Marash Mali në Florida USA, “Shqipnia Etnike nga e vërteta në andërr”, kam lexue një citat të Karl Marksit, i cili me 1878, i shkruen Kongresit Berlinit, si vijon:
“Arnautet (Shqiptarë) janë pjesërisht të krishtërë të ritit orthodoks-grek dhe, pjesërisht muslimanë, ku duke gjykuar përsa i njohim janë pak të përgatitur për t’u qytetruar. Prirja e tyne grabitqare duhet t’a detyrojë çdo qeveri fqinjë ti mbajë ata nën trysni të rrebtë ushtarake, përderisa përparimi industrial në vendët fqinjë të mos u sigurojë punë atyre, si p.sh. dru-prerës dhe ujë-bartës.” Nuk mund të mohohet fakti se gadishullin e quajti “Turki Europjane”. “Është pasuri natyrore e trashiguar nga stërgjyshrit e rracës sllave të jugut. Rivalë të sllavëve janë vetem barbarët arnaut dhe turqit, të cilët prej kohësh quheshin dendur si kundërshtarë më të egër të qytetrimit e përparimit, përkundrazi sllavët janë të vetmit bartës të qytetrimit”.

Z.Fritz Radovani komenton;
Tham të vërtetën se deri sot nuk kam lexue citat për Shqipninë dhe Shqiptarët ma antinjerzor dhe barbar, ashtu siç ka kenë edhe teoria e tij regresive në Shek. XX, e rrjedhun nga “Kapitali” e, kjo, jo vetëm për Shqipninë, por pikërisht, për vetë sllavët, “bartës të qytetnimit” simbas Marksit, të cilët, teoria e tij nga kjo botë e qytetnueme evropjane mujti me i ba kopshti zoologjik i komunizmit në Evropë, Azi e deri në Meksikë e Kubë ku ka bijtë kjo farë e keqe.
Shumë çudi: Marksi nuk dinte se kufini shqiptar i vëndosun padrejtësisht në Jug me Greqinë, nuk bije në Vermosh as në Hot apo në Grudë dhe, se, Popullsia Shqiptare në ato krahina nuk asht e ritit Orthodoks – grek, por asht tash dy mijë vjet Katolike…Shqiptare!
“Shoku” Marks paska dashtë me pa Popullin Shqiptar tue trokitë në dyert e Serbisë dhe, tue vrritë “A keni dru me pre?…”. Na edhe e kemi pasë mbajtë për të mendshëm këte “zotni”!
Sigurisht, nga ky citat asht nisë edhe Enver Hoxha, që mendoi si me veprue me të gjithë ata që ishin intelektual e dijetarë dhe me i këthye në drue – prerës dhe në ujë – bartës, tue punue gjithë jetën në kanalet ujitëse dhe në tharjet e kënetave të mbarë vendit nga Taravica deri në Sarandë apo minjera. Pikërisht këtij citati i përket edhe thanja filozofike e Prof. Kolë Alimhillit: “Në sistemin komunist, profesorët e vërtetë përfundojnë në burg, kur dalin nga burgu, po dolën, shkojnë hamaj e fshesaxhijë, ndërsa hamajt e fshesaxhijtë e vërtetë drejtojnë shtetin!…”.
Na kemi kujtue se kështu vepronte Enver Hoxha, po në fakt ky paska kenë parim i vjetër i Marksit, që u vue në jetë nga Ruzvelti me Stalinin tue i sherbye ksaj çeshtje Enver Hoxha, që nga viti 1941 bashkë me të gjithë komunistët bolshevikë të Ballkanit, të Rusisë e ma vonë të Kinës, që tue lanë shtetin në dorë të hamajve dhe të paditunve mendonin me sjellë “qytetnimin” tek na!

Fritz Radovani
Copyright Proletari.Com