Lexuar 4326
Dyzet e katër pjesëtarë të Policisë të Kosovës janë zënë në “flagrancë” me diploma të falsifikuara. Madje këta “protagonistë”, kanë mbajtur pozita të rëndësishme në Drejtorinë e Përgjithshme të Policisë së Kosovës, vetëm me një shkollë fillore, raporton e përditshmja Zëri.

Ish-pjesëtarët e uniformes blu kanë shërbyer në Policinë e Kosovës me vite të tëra, duke mbajtur kështu misterin e falsifikimit të diplomave të shkollës së mesme.

Kjo është konfirmuar për gazetën “Zëri” nga drejtues policorë, të cilët kanë theksuar se Drejtoria për Hetime të Brendshme e Policisë së Kosovës pas verifikimit të përgatitjes profesionale të secilit kandidatë, ka arritur që të vërtetojë disa raste për falsifikim të diplomave.

Ata thonë se rreth 44 ish-pjesëtarë janë larguar nga puna, pasi që është vërtetuar se kanë falsifikuar diplomat e tyre të shkollës së mesme në kohën kur kanë aplikuar për të
qenë pjesë e këtij institucioni, ose nuk kanë poseduar fare diploma, e që ka qenë minimumi i kriterit për konkurrim.

Zëdhënësi i Policisë së Kosovës, Arbër Beka, ka pranuar se janë shënuar disa raste të falsifikimit të diplomave, por sipas tij, nëse merret numri i përgjithshëm i pjesëtarëve policorë, atëherë rastet e tilla janë të pakta.
Zeri.info