Proletari Forum & Italia Forum - Shiko temë - At Ambroz- Martinit i fundit i Klerit te Veriut

Laert

Poste:	3600
Antarësuar:	28 Janar 2009, 13:10

At Ambroz- Martinit i fundit i Klerit te Veriut, Posted 15 Shkurt 2010, 19:53

Të nderuem bashkatdhetarë,

Lajmi i vdekjës së At Ambroz Martinit u përhap anëmanë në saje të internetit,
dhe erdhi deri këtu në Bruksel ku Ai pat sherbye si famulltar katolik për 20 vjet.

Unë pata fatin ta gjej këtu me 1990, dhe deri kur u largue. Ta njoh e ta vlerësoj,
si njeri fetar, intelektual i naltë e patriot i madh, luftar i fjalës e pse jo edhe i pushkës. Orator në disa gjuhë, jo nga ata që i përgatisin fjalimet me shkrime por nga ata që i krijojnë në çast dhe i lanë njerëzit me gojë hapun dhe i ngrejnë sallat peshë.

Nga pulti i kishës, ku ai u fliste besimtarëve për ligjë, rregulla, doktrinën fetare,
për traditat ma të mira shqiptare, ngrihej edhe zani i dënimit të krimeve të diktaturës, që edhe atij ia kishte internue njerëzit, bashkë me mija të tjerë. Dikush i pat thanë, - or padre po nuk flitët në kishë për politikë! Si the ? për botën tjetër ndoshta po, por për botën shqiptare kisha nuk asht vetëm një vend i shenjët, por edhe një qendër e patriotizmit që ne duhet të mbajmë të gjallë në çdo rrethanë e situatë. Gjendja që po kalon Shqipnia asht tragjike, e në qoftë se në kishë unë ngre çeshtjen e njerëzve që torturohën e vdesin nëpër kampe e burgje, ata njerëz janë të gjithë të shenjtë, pse janë martirë të idealit ma të naltë, martirë të lirisë. E kjo nuk asht politikë, por humanizëm, e humanizmi asht i pandarë nga besimi.

Isha në Shqipni, dhe një javë para se me u largue, pata fatin ta takoj, të lodhun e të ngarkuem me vite, por kurajoz e trim si gjithmonë. Për mue ishte nder. Ai i kishte ndejtë pranë në çastët e fundit prindit tim te krevati i vdekjës e deri në varrim, ku kishte mbajtë një fjalim të bukur, në radhën e oratorëve të tjerë, të patriotëve Muharrem Bajraktari e Rifat Kolgjini. Në çastin kur po largohesha, bame disa fotografi, dhe ai më dha bekimin, që do të më shoqnojë gjithë jetën e mbetun.

Ju të tjerët që shkrueni, ju lumtë që përkujtoni këta burra, fetar e atdhetarë, intelektualë e patriotë të flakët, që në zemër kishin jo vetëm besimin por edhe atdheun e lirinë, dy terma të pandame, pse nuk mund të ketë atdhe pa liri e liri pa atdhe. At Ambroz Martini, parësishit ishte shqiptar e pastaj fetar. Ai e citonte shpesh frazen magjike të Vaso Pashës " Feja e shqiptarit asht shqiptaria " !
E vetmja mungesë e këtij françeskani të vogël me shtat, por të madh me shpirtë, ishte se nuk shkruente dendun, dhe oratoria e tij që i ra botës përreth nga Australia, në Amerikë e deri në Europë, mu në qendrën e saj tek Brukseli, mbeti e pashkrueme.

Një tjetër nga meritat që i duhën njohun, asht, se Ai i pari ngriti shkollën shqipe në Belgjikë për të gjithë femijët e shqiptarve pa dallim, qysh me ardhje e tij në këte vend me 1974 e deri vonë.

Në këte përkujtesë të shkurtë, përfaqësoj të gjithë ata shqiptarë që e njohën dhe e patën Bariun e tyne të mirëfilltë gjatë shumë vjetëve.

I dashtun Patër Ambrozi, përulemi para kujtimit dhe vorrit atje në Shkodren tande të dashtun, me nderim e përmallim!
Shpirti Yt pushoftë në paqë! "Requescat in Pace", Amen.

Lek Pervizi.
Bruksel me 14 janar 2010.

''Skllavëria jonë vjen nga fakti se i nënshtrohemi sundimit të gënjeshtrës, se nuk ia çjerrim maskën e nuk protestojmë kundër saj çdo ditë”.